Eier vo zfridene Hüehner
Marans, Araucana, Appezäller Spitzhube, Cemani… Hie si Hüehner vo ganz verschidene Rasse deheime. Natürlich fählt e Güggel nid, är heisst Bänzli! Ou d Eier hei ganz verschideni Farbe: Wiss, brun, beige, grüen u schoggifarbig.
Eier chöi bi üs im Sächser- oder Zähner-Schachteli abgholt wärde. Wiu mir Hobbyhauter si, chöi mir leider nid garantiere, dass o geng gnue Eier vorrätig si. Eifach frage ?
D Eier choschte 50 Rappe pro Stück, es het immer verschidefarbigi u verschide grossi derby.
U so chöit Dir üs erreiche, we mir grad nid umewäg sy:
☎ Erika: 079 812 88 81
☎ Beni: 077 416 42 81
Was frisst es Huehn?
Richtig fein isch es Ei nume denn, we d Hüehner o guets Fueter überchöme. Drum wärde üsi Tier mit Früschem us em Garte u mit Biofueter gfueteret. Derzue gits Gras ab der Wise u Grit. Das si chlini Steinli wo Hüehner für der Verdouig bruche. Natürlich bruchts o jede Tag gnue früsches Wasser.
Wie läbt es Huehn?
Hüehner tüe für ds läbe gärn am Bode scharre u chraue, so finge si hie e Chäfer, dert es Würmli u süsch no öppis. Drum isch es wichtig dass Hüehner uf Naturbode chöi läbe, uf Wise u Waldbode. Hüehner hei nid gärn nass, drum bruche si es trochnigs Plätzli, o wes rägnet u schneit! So wie mir Mönsche hei si gärn e greglete Tagesablouf, am Morge frässe, druf am Vormittag es Ei lege u am Namittag ds Läbe gniesse ☀
Wie alt wird es Huehn?
Die meischte Hüehner wärde nume 5 bis 6 Jahr alt. E chli angers isch es bi üs. We es Huehn richtig alt wird u gar keis Ei me leit, darfs glich wyterläbe. Ds eltischte Huehn isch es Araucana u läbt itz scho sit acht Jahr!